Хари Кејн по освојувањето на втората „Златна копачка“ во Европа зборуваше за својата иднина и призна дека враќањето во Премиер лигата веќе не го привлекува како порано. Капитенот на англиската репрезентација целосно се пронајде во Баерн Минхен, каде што ја одигра најдобрата сезона во кариерата.
Кога Кејн во летото 2023 година го напушти Тотнем и потпиша за Баерн, неговиот трансфер во Германија многумина го гледаа како привремена авантура. Се очекуваше по неколку сезони да се врати во Англија и да тргне во напад на големиот рекорд на Алан Ширер.
Но, три години подоцна, ситуацијата е целосно поинаква. Кејн е среќен во Минхен, неговото семејство се навикна на животот во Германија, а враќањето во Премиер лигата веќе не му е приоритет. Англискиот напаѓач зад себе има фантастична сезона. Во Бундеслигата постигна 36 гола и по вторпат ја освои европската „Златна копачка“.
„Кога заминував, мислев дека дефинитивно ќе се вратам. Сега веќе немам таква желба. Исклучително сум среќен во Минхен, а заминувањето од Англија ми ги отвори очите кон еден целосно поинаков фудбалски свет“, изјави напаѓачот на Баерн.
Кејн во Премиер лигата застана на 213 гола, додека Ширер на врвот како најдобар стрелец во англиската елита има 260.