Шкендија утре со
почеток од 18 часот гостува во Финска, кај екипата на Хелсинки, по победата од
3-1 на домашен терен во Струмица, владее голем оптимизам во редовите на
тетовските „црвено-црни“ за прогрес во следната рунда квалификации во Лига
Европа.
„Имаме резултат
кој ветува, на реваншот против Хелсинки влегуваме крајно оптимистички за да се
пласираме во третото коло. Се подготвувавме одлично во пресрет на утрешната
средба, нема да се браниме, напротив, ќе ја играме онаа нашата препознатлива
игра“ издвои шефот на стручниот штаб на македонскиот вицепрвак, Ќатип Османи.
„Дојдовме овде по
позитивен резултат, нема да биде лесно, но подготвени сме максимално за овој
натпревар. Сериозно ќе му пристапиме на мечот и се надеваме на пласман во
следната фаза“ изјави капитенот на Шкендија, Ферхан Хасани.
Вреди да се
издвои дека Шкендија денес на својот официјален клупски сајт објави дека ја
прекина соработката со Дино Меџедовиќ и Јуре Чолак. Договорите на обајцата со
тетовскиот прволигаш се прекинати а исто така со клубот се разделува и Бесир
Нухи.
Вториот
македонски претставник во второто квалификациско коло во Лига Европа, екипата
на Работнички со нерешен резултат (1-1) патува на гостувањето кај белорускиот
претставник Динамо Минск. Оптимизам владее и во таборот на „Романтичарите“.
„Имаме
сили за да го елиминираме Динамо Минск, иако тоа нема да биде нималку лесна
задача. Но, сега знаеме точно за каков тим се работи, ги знаеме нивните добри и
лоши страни, и ќе се обидеме од тоа да извлечеме корист. Тие сигурно се подобро
физички подготвени, со оглед дека нивното првенство е во полн ек, и имаат
одиграно 15 кола. Ние допрва влегуваме во вистински ритам, но можеме да го
пронајдеме вистинскиот пат за да ја оствариме целта“ вели Душко Трајчевски капитенот на Работнички,
во изјава за официјалниот клупски сајт.
„Треба да
одиграме многу подобро отколку на првиот меч во Скопје, а доколку први го
отвориме резултатот, мислам дека ќе бидеме блиску до целта“ додаде капитенот на „Романтичарите“ кои веќе го
одржаа првиот тренинг во Белорусија каде утре го играат реванш мечот во
терминот од 17 часот.