Македонската фудбалска репрезентација до 21 година вечерва во Гдиња на стадионот „Миејски“, го игра првиот натпревар на Европското првенство во Полска.
Македонските херои кои ја направија нацијата горда го почнуваат главниот настан, избраниците на Благоја Милевски не се задоволуваат само со настап на шампионатот.
Противник е силната селекција на Шпанија која според обложувалниците е и главен фаворит за освојување на Европското првенство во Полска. Во составот имаа играчи кои веќе се ѕвезди во своите тимови како Хектор Бељерин, Саул Нигез, Марко Асенсио, Ињаки Вилијамс…
„Шпанија е една од најквалитетните репрезентации, индивидуално се одлични, но ние сме 100 отсто мотивирани и го чекаме денот на натпреварот. Кај фудбалерите гледам насмевка на лицата, а тоа е само по себе е позитивно. Знаеме дека мораме да држиме високо ниво на игра во текот на целиот натпревар и да бидеме дисциплинирани. Ова е прв натпревар за нас на Европско првенство, но во изминатите две години одигравме доволно силни дуели и мислам дека нема да биде претешко да го надминеме притисокот кој го носи овој тип натпревари“ вели Зајков.
Селекторот Благоја Милевски верува во своите фудбалери, знае дека мотивацијата, одговорноста и дисциплината во играта ќе бидат клучот за добар настап на Европското првенство.
„Очекувам да играме со мотивација, одговорност и дисциплина, нашата примарна цел е да се претставиме на вистински начин. Оваа група на фудбалери е многу талентирана и полна со потенцијал, среќен сум за нив. Нашата цел е да го дадеме најдоброто и дресот секогаш да го носиме со гордост“ – вели Благоја Милевски.
„Се подготвивме добро и сигурен сум дека секој ќе си ја заврши својата задача. Треба да ја презентираме Македонија во најдобро светло како што го направивме тоа во квалификациите. Бевме во петтиот шешир кога започнаа квалификациите но на крајот завршивме на првото место пред Фрнација, Украина и Исланд“.
Натпреварот помеѓу Македонија и Шпанија се игра со почеток од 20:45 часот, претходно од 18:00 часот се игра првиот натпревар во нашата група помеѓу Португалија и Србија.