Шпанскиот фудбалер, Хоселу е нов играч на Ал Гарафа, соопшти клубот од Доха.
Хоселу со катарскиот клуб потпиша договор на две години со опција соработката да се продолжи на уште една.
Во изминатата сезона 34-годишниот шпански напаѓач настапуваше на позајмица во Реал кој ја искористи опцијата да го откупи од Еспањол за 1.5 милион евра за денес за истата сума да го продаде на Ал Гарафа.
„Благодарен сум на Реал за се што ме научи како дете, го одржа мојот сон и го оствари. Заминав пред многу години, но никогаш не заминав. Денес заминувам, но всушност останувам“, напиша Хоселу.
Хоселу беше во Реал Мадрид во период од 2009 до 2012 година и во изминатата сезона постигна 10 гола на 34 натпревари во првенството. Исто така постигна два одлучувачки гола против Баерн во полуфиналето од Лигата на шампионите.