Фудбалерите на
Дерби во вторникот се собрале на тимска вечера, а неколкумина решиле да се
опуштат малку повеќе и продолжиле да пијат до полноќ.
Ваквата одлука на
крајот се покажала катастрофална откако Мартин Лоренс со својот Рејнџ Ровер
удри во бандера, а потоа се судрил и со Мерцедесот на соиграчот Мејсон Бенет.
Двајцата поминале без повреди, но настрадал капитенот Ричард Киох, кој има
сериозна повреда на коленото и за него сезоната заврши.
Лоренс и Бенет
биле приведени, против нив е покренато обвинение дека возеле во алкохолизирана
состојба и следниот месец ќе треба да се појават на суд.
Дерби го осуди
инцидентот и најави ригорозни казни: „Мала група фудбалери, во која бил и
нашиот капитен Ричард Киох, продолжиле да пијат во ноќта. Требале да знаат кога
е доста, а исто така ја игнорирале и можноста да бидат пренесени дома со
автомобили кои им ги обезбеди клубот“.
„Играчите
инволвирани во овој немил настан се под интерна истрага и на дисциплинска
постапка. Знаат дека ќе платат голема цена за своите постапки, но и дека ќе ја
добијат потребната поддршка за да се рехабилитираат и вратат во тимот“.
Дерби лани играше
плеј-ов за враќање во елитата, но на стартот од оваа сезона резултатите се
далеку под очекувањата со само една победа на осум натпревари.