Чилеанецот вчера го имаше своето деби во дресот на „Ѓаволите“, Алексис Санчез од првата минута го започна дуелот со Јеовил во ФА Купот, кој Манчестер јунајтед го доби рутински со 0-4.
Популарниот „Ел Нињо Маравиља“ лошo отвори, имаше неколку погрешни додавања во воведниот дел од средбата, но ја поведе акцијата по која Рашфорд го отвори резултатот, а потоа во вториот дел му асистираше на Андер Ерера за 0-2.
Алексис Санчез беше заменет во 78. минута, а по неговото излегување од игра, Манчестер јунајтед го „дотолчи“ противникот со головите на Лингард и Лукаку во финишот од средбата.
Чилеанецот потоа беше прогласен за играч на мечот, одлука која не им се допадна во таборот на домаќините.
„Алексис Санчез е играч на натпреварот. Не сме сигурни кој го направи овој избор, сигурно се работи за маркетиншки потег!“ – гласеше пораката на Твитер.
Изборот го направи Мартин Кион, поранешниот играч на Арсенал кој изминатиов период силно го критикуваше Алексис Санчез и го нарече Чилеанецот „платеник“ поади тоа што ја одбрал побогатата понуда од Манчестер јунајтед а не онаа на Манчестер Сити за која си имаше подадено рака уште пред неколку месеци.