Македонската репрезентација до 21 година утре гостува кај Холандија во квалификациски меч, дуелот започнува од 20 часот.
Андреј Стојчевски е еден од клучните играчи во составот на Драган Канатларовски и тој верува дека со борба и верба, Македонија може до позитивен резултат.
„Пред се утре е најбитно сите да бидеме здрави, физички и психички да бидеме подготвени за утрешниот предизвик. Не очекува тежок натпревар против силен противник и ќе мора да бидеме максимално сконцентрирани во текот на сите 90 минути. Свесни сме за квалитетот со кој располага Холандија, репрезентација која е една од најдобрите во Европа, но свесни сме и за нашиот потенцијал кој треба и се надевам дека ќе го покажеме на утрешниот натпревар. Единствено со многу борба и голема верба во самите нас, можеме да се надеваме на позитивен резултат. Секој натпревар е различен, секој од нас што е дел од оваа репрезентација вклучувајќи ме и мене го дал максимумот и ќе продолжи да го дава, без разлика против кого играме“, вели Стојчевски.
Македонските млади фудбалери добро ги стартуваа квалификациите, но потоа дојде до пад во играта.
„Успеавме да оствариме позитивни резултати на натпревари на кои се веруваше дека тоа не можеме да го направиме. Стартувавме многу добро во овие квалификации, но не успеавме да продолжиме во ист ритам. Многу често ни се случуваше пад на концентрација во клучни моменти, нешто што на крајот не чинеше многу бодови. Продолжуваме понатаму, нема предавање, пред нас се нови натпревари од квалификациите. Очекувам од сите нас максимална жртва, многу борба и трчање, а се со цел да се вратиме на победничките патеки како на почетокот на квалификациите“.
„Секој треба да биде подготвен да го даде максимумот кога игра за Македонија, бидејќи не секој ја имаа таа прилика да бидел дел од репрезентацијата. Верувам и се надевам дека во следните четири меча ќе освоиме што е можно повеќе бодови, за што подобар пласман“, истакна Стојчевски.
Македонија е претпоследна на табелата со само шест бода, зад нас е сао Гибралтар со кого играме по дуелот со Холандија.