Неверојатен пораз на младата фудбалска репрезентација на
Македонија за фудбалери до 21 година, која подновена, настапува во
квалификациите за пласман на Европското првенство во Италија 2019. година.
По стартниот триумф на гости кај Ерменија со 0-3, нашите
надежи загубија на домашен терен од Србија со 0-2, а денес претрпеја шокирачки
пораз кај тоталниот аутсајдер Гибралтар, минимален со 1-0.
Единствениот гол на мечот беше дело на Торилја во 64. минута,
нанесувајќи му шокантен резултат на нашиот тим, ова воедно ќе биде едно од
најголемите изненадувања од денешните предвидени натпревари.
Вреди да се напомене дека пред оваа средба, Гибралтар
имаше пет порази од исто толку и одиграни натпревари во групата, прими 14
погодоци, а не реализираше ниту еден, првиот го постигна токму денеска.
Ќе издвоиме и дека Попзлатанов во самиот финиш од средбата заработи исклучување, откако доби втор жолт картон.
Нашите фудбалери имаа вкупно 15 обиди кон противничкиот
гол, од нив осум беа во рамките на голот, додека пак домаќинот од четири обиди
реализираше еден погодок.
Македонија: Ѓорѓев, Амановиќ, Попзлатанов, Симовски, Костадинов, Петковски (Крезиќ 68’), Костов, Георгиев, Селмани (Абаз 55’), Тотре (Илјази 85’) и Исени.
Следен предизвик за избраниците на Благоја Милевски е
дуелот против соодветната селекција на Австрија, истиот меч е предвиден да се
одигра на 14. ноември, на домашен терен.