Босна и Херцеговина со победата од 3-1 над Романија во Зеница си обезбеди место во дополнителните квалификации и остави реални шанси за директен пласман на Светското првенство. Гостите поведоа преку Бирлигеи, а БиХ направи целосен пресврт со головите на Џеко, Бајрактаревиќ и Табаковиќ. Романците со овој пораз веќе го заклучија третото место.
По дуелот следуваа жестоки реакции од Букурешт. Романските медиуми пренесоа дека дел од домашните навивачи свиреле на химната на Романија и ги навредувале гостинските играчи, а од трибините имало и меѓусебни провокации.
Политичарот Алин Тисе, присутен на стадионот „Билино Поле“, најостро ја критикуваше атмосферата и условите во Зеница. Неговата оцена беше јасно изнесена:
„Во Босна доживеав една од најтажните ситуации што може да му се случи на еден навивач на репрезентација. Со агресивни и необразовани навивачи кои изгледаа како да се разбудиле од некое мрачно време. Стадион како оставен во минато столетие. Разликата во споредба со Клуж? Од цивилизација до палеолит, до најстарото камено време.“
Тисе најави дека ќе поднесе официјална пријава до ФИФА и до УЕФА, уверувајќи дека евидентираните инциденти го нарушуваат угледот на натпреварите и бараат строга реакција.