Сите во Баерн Минхен беа свесни дека ќе дојде ден кога Томас Милер ќе се прости од Баерн Минхен, меѓутоа веројатно не очекуваа дека тоа може да се случи на крајот на тековната сезона.
Германски „Билд“ пренесува дека Милер на крајот на актуелната сезона ќе го напушти Баерн по 25 години поминати во клубот.
Милер од својата 10-та година беше предводник на секоја генерација во Баерн, а сега е на повидок разделба.
Во текот на репрезентативната пауза биле одржани неколку состаноци помеѓу Милер, Макс Еберл и Кристофер Фројдн.
На тие состаноци не успеале да пронајдат договор, па извесно е дека германскиот ветеран ќе побара нова средина бидејќи нема намера да оди во пензија.
Сезонава Милер одигра само 11 натпревари како стартер и дури на 23 влегуваше од клупата за резерви, постигна пет голови и додаде исто толку асистенции.
Вкупно за Баерн Милер запиша 741 настап во кој дојде до 247 голови и 273 асистенции.
Освои два трофеи во Лигата на шампионите, две светски клупски шампион, 12 титули во Бундеслигата и шест во Купот на Германија. Се најавува дека негова наредна дестинација ќе биде МЛС лигата.