Германскиот фудбалер Томас Милер ги сподели своите размислувања околу можниот настап на Лионел Меси на Светското првенство во 2026 година, нагласувајќи дека присуството на аргентинската ѕвезда би можело сериозно да ја промени рамнотежата на силите.
Капитенот на Аргентина сè уште нема донесено конечна одлука дали ќе игра на следниот Мундијал, но Милер смета дека неговото евентуално појавување би било еден од најинтересните моменти на турнирот.
„Би било многу интересно доколку игра на Светското првенство. Тоа би можело значително да го промени односот на силите. Иако не сум сигурен дали тоа би ја направило аргентинската репрезентација подобра или полоша“, изјави искусниот германски фудбалер.
Милер потсети и на својот директен дуел со Меси во финалето на МЛС, нагласувајќи дека и покрај годините Аргентинецот и понатаму има огромно влијание на играта.
„Играв против Меси во финалето на МЛС и тој беше апсолутно брилијантен секој пат кога ќе ја примеше топката. Ги движеше напаѓачките акции од вистинските позиции. Но не сум сигурен дали неговиот сегашен стил на игра ќе се пренесе на врвното ниво на меѓународниот фудбал“, додаде Милер.
Сепак, германскиот репрезентативец нема дилеми околу квалитетот на актуелниот светски првак и јасно ја гледа Аргентина како еден од главните фаворити за трофејот во 2026 година.
„Во секој случај, Аргентина е високо на мојата листа кандидати за трофејот“, заклучи Милер.