Судиите не дозволија да се одигра натпреварот од Општинската фудбалска лига Кисела Вода (четврта лига) меѓу екипите на ФК Слободен и Студеничани поради наводно лош терен.
Тоа е теренот на стадионот во АМС Трубарево на кој ФК Слободен играше и минатата сезона во многу полоши услови, па од овој клуб се сомневаат дека одлуката на судиите можеби има некаква позадина која не е поврзана со спортот.
„Известување за јавност во врска со натпреварот од 1-во коло ОФЛ Кисела Вода:
На 29.09.2024 (недела) со почеток од 12ч на фудбалскиот стадион АМС Трубарево Скопје, требаше да се одигра дерби натпреварот во рамки на 1-во коло од ОФЛ Кисела Вода помеѓу екипите на ФК Слободен Скопје и ФК Студеничани.
По пристигнувањето на двете екипи и службените лица, главниот судија констатираше дека теренот е неподобен за игра и натреварот не се одигра.
Предметот е во рацете на Комисијата за натпреварување на ОФС Кисела Вода која што треба да донесе одлука во текот на оваа недела.
На теренот на којшто требаше да се игра натпреварот сме одигрувале многу натпревари претходно дури и сред зима и во многу полоши услови. Тоа ни дава за право да сме загрижени дека позади оваа одлука за неодигрување на дербито од 1-во коло, има поголема игра.
Одлуката на Комисијата за натревари при ОФС Кисела Вода ќе ја почитуваме и се надеваме дека ќе биде во интерес на спортот и дека натпреварот ќе се одигра на зелениот терен, а не на зелената маса.
Нека победи спортот“, стои во соопштението на ФК Слободен.