Тренерот на Челси, Енцо Мареска стави јасно до знаење дека бара нов дефанзивец по повредата на Леви Колвил и ги понижи Весли Фофана и Беноа Бадиашиле, за кои беа потрошени преку 100 милиони фунти.
Леви Колвил, кој беше столбот во одбраната на Челси минатата сезона, ги повреди предните вкрстени лигаменти на коленото и ќе го пропушти најголемиот дел од новата сезоната.
„Сините“ имаа неколку дефанзивци во составот кои можат да помогнат, но Енцо Мареска инсистира да пристигне ново име.
„Клубот точно знае што мислам – потребен ни е нов дефанзивец. Бараме решение во играчите кои веќе ги имаме, но клубот знае што мислам“ – вели тренерот на Челси.
Опции му се Весли Фофана за кого беа платени 70+ милиони фунти, како и Беноа Бадиашиле за кого беа потрошени 35 милиони фунти, но двајцата беа понижени.
„Фофана би можел да го замени Колвил, но прво треба да е фит, а не повреден. Играше 45 минути на таа позиција, мислам дека беше првото полувреме против Борнмут на гости, не знам дали паметите. И тоа беа најлошите 45 минути откако јас станав тренер на Челси“.
„Бадиашиле играше на таа позиција во финалето во Конференциска лига, играше во првото полувреме и губевме со 1-0. Потоа влезе Колвил и победивме со 4-1, па не е исто“.