Манчестер Сити конечно убедливо победи во Премиер лигата по пауза од еден месец. „Граѓаните“ со 4-1 го совладаа Вест Хем на првиот натпревар од 2025 година.
Разиграно влегоа избраниците на Пеп Гвардиола и веќе во 10. минута поведоа со автоголот на Куфал, но по „вина“ на Савињо. Бразилскиот фудбалер забележа уште две асистенции, бидејќи двапати му додаваше на Ерлинг Халанд за неговите погодоци. За високи 4-0 се погрижи Фил Фоден, додека почесен гол за Вест Хем постигна Филкруг.
Кристал Палас и Челси одиграа реми (1-1) на „Селхрст Парк“. Момците на Енцо Мареска поведоа преку Палмер во првиот дел, а потоа Матета донесе израмнување и бод за домашната екипа.
На останатите терени Брентфорд беше убедлив кај Саутемптон (0-5), Астон Вила го совлада Лестер (2-1), а минимален триумф забележа и Борнмут против Евертон (1-0).