Македонија слави голем триумф на гостувањето кај Израел, победа за нови три бода и зголемена самодоверба за продолжението од квалификациите. Нашата репрезентација конечно на гостински терен совлада подобро рангирана селекција.
Избраниците на Игор Ангеловски одиграа одличен натпревар во текот на сите 90 минути, Македонија создаде повеќе шанси од Израел и на крајот заслужено се радуваше на победата.
И во првото полувреме ја затресовме мрежата на Израел, Ристевски погоди, но судиите го поништија голот поради офсајд од Несторовски, спорна ситуација.
Неколку минути подоцна стативата беше сојузник на Израел, домаќините за малку ќе си дадеа автогол.
Во второто полувреме Македонија уште повеќе го нападна голот на Израел, кој главно се обидуваше со шутеви од далечина да постигне гол.
Клучниот момент се случи во 73. минута кога Елиф Елмас прекрасно асистираше до Горан Пандев кој мајсторски реализираше за водство на Македонија од 1-0. Прв гол на Пандев на гостински терен во квалификации по 2006 година.
До крајот на мечот Израел јалово се обидуваше да дојде до изедначување, но Македонија рутински го сочува резултатот и на крајот заслужено се радуваше на големата победа.
Вреди да се истакне и партијата на Столе Димитриевски кој имаше неколку одлични интервенции на голот на Македонија.
Македонија одигра многу зрел натпревар, сите редови функционираа одлично и победата дојде. Сега на ред е мечот со Албанија кој во вторник се игра во Струмица.