Ливерпул со убедливи 4-1 го победи Ипсвич, Арсенал со 1-0 триумфираше на гостувањето кај Вулвс иако голем дел од мечот го играше со фудбалер помалку.
На Енфилд приказната немаше изненадување, Ливерпул буквално го здроби својот противник во првото полувреме по кое веќе имаше водство од 3-0.
Серијата ја отвори Собослаи, па продолжи Салах, пред крајот на полувремето погоди и Гакпо.
Гакпо постигна уште еден гол во вториот дел, а Ипсвич во 90. минута успеа само да постигне почесен погодок.
Арсенал одигра комплициран меч кај Вулвс, но на крајот успеа да го добие минимално со 1-0.
Во 43. минута Арсенал остана со фудбалер помалку откако Луис Скели заработи директен црвен картон, можеби престрого.
Но, силите се израмнија во 70. минута кога Жоао Гомез доби втор жолт картон.
Четири минути подоцна Калафиори даде гол кој значеше победа на Арсенал од 1-0.
Саутемптон само го налути Њукасл кога поведе со гол на Беднарек во 10. минута.
До крајот на првото полувреме Исак даде два гола за комплетен пресврт, а во второто полувреме Тонали погоди за конечни 3-1 за Њукасл.
Борнмут со неверојатни 5-0 го победи Нотингем Форест, Евертон со 1-0 славеше на гостувањето кај Брајтон.