ПСЖ и покрај бројните повреди успеа да слави на гостувањето кај Барселона, Рамош ги фрли „каталонците“ на колена“, 90. минута беше кобна и за Манчестер Сити, кој киксна на гостувањето кај Монако.
Дербито во 2. коло во Лигата на шампиони му припадна на ПСЖ, „светците“ со 1-2 си заминаа од гостувањето на „Монжуик“.
И покрај тоа што имаа бројни повреди, избраниците на Енрике успеаја да ја фрлат Барселона на колена и тоа со гол во самиот финиш.
Торес ги донесе „каталонците“ во предност од 1-0 по дваесет минути игра, но пред крајот на првиот дел, Мајулу изедначи на 1-1.
Барса се мачеше во продолжението од мечот, ПСЖ го имаше поседот и ја контролираше играта, во 90. минута успешно беше избегната една офсајд стапица, а Рамош рутински реализираше за 1-2.
90. минута беше кобна и за Манчестер Сити, кој киксна на гостувањето кај Монако.
Со двата гола на Халанд, „граѓаните“ имаа предност од 1-2 на полувремето, но во вториот дел повеќе мислеа како да ја умртват играта отколку да го решат натпреварот па беа казнети во финишот кога беше направен несмасен пенал.
Ерик Даер презеде одговорност и погоди од белата точка за 2-2.
Арсенал со 2-0 го совлада Олимпијакос, Наполи на нашиот Елиф Елмас со 2-1 славеше над Спортинг, додека пак најубедливата победа вечерва ја забележа Борусија Дортмунд со триумф од 4-1 над Атлетик Билбао.
Виљареал и Јувентус одиграа 2-2, а без победник заврши и пресметката помеѓу Баер Леверкузен и ПСВ, таму резултатот беше 1-1.