Фабио Капело проговори за проблемите кои ги имал на кормилото на Реал Мадрид во сезоната 2006/2007 и како бил подготвен да остане без работа поради Дејвид Бекам.
Фабио Капело се врати на „Бернабеу“ летото во 2006 за нова авантура на кормилото на Реал Мадрид, и иако успеа да ја освои титулата во Ла Лига, доби отказ на крајот од сезоната.
Италијанскиот стратег сега проговори за проблемите кои ги имал таа сезона и како влегол во војна со Флорентино Перез поради Дејвид Бекам.
„Бекам имаше потпишано со Лос Анџелес, па клубот беше навреден и ми наредија повеќе да не го пуштам во игра. Беше изоставен десетина дена, но и покрај тоа Дејвид тренираше нормално, доаѓаше на време, го даваше максимумот и си одеше последен“ – раскажува Фабио Капело.
„Па тропнав на врата кај претседателот и му реков, „Од утре го враќам Бекам на теренот бидејќи тој е сериозна личност. Доколку не ви се допаѓа ова, слободно можете да ме избркате, но ова е мојата одлука“. Па Бекам беше вратен во тимот“.
Таа сезона, Фабио Капело имаше проблеми и со Роналдо, кој сепак беше продаден поради недисциплина и вишок килограми.
„Роналдо го сметам за најдобриот играч кого сум го тренирал, но морав да донесам одлука да го избркам од тимот. Разговарав со претседателот и решивме да го продадеме“.