Прославениот италијански стратег Фабио Капело не го криеше воодушевувањето по победата на Италија над Северна Ирска во полуфиналето од баражот, при што во разговор за „Газета дело Спорт“ зборуваше и за финалето против Босна и Херцеговина.
Поранешниот тренер на Милан, Рома, Јувентус и Реал Мадрид ги пофали техничките квалитети на БиХ, но нагласи дека мечот на гости против Велс во Кардиф веројатно би бил поголем предизвик за „аѕурите“ поради нивниот стил на игра.
„Во финалето нè чека БиХ, противник со добра техника и сигурно посилен од Северна Ирска. Но, морам да бидам искрен, кога станува збор за борбен дух и ритам, Велс ќе беше многу покомплицирана пречка, особено на нивен терен“, истакна Капело.
За мечот со Северна Ирска, Капело призна дека го доживеал многу емотивно:
„Врескав како луд на каучот. Репрезентацијата за мене е многу повеќе од обичен тим“.
Тој додаде дека Италија под водство на Џенаро Гатузо во првото полувреме играла премногу бавно и со недоволен интензитет, но сепак го радува карактерот и борбеноста на тимот.