Поранешниот фудбалер на Интер, Луис Хименез зборуваше за периодот во кој настапуваше за овој клуб. Тоа беше во времето на Златан Ибрахимовиќ, Луис Фиго, Хавиер Занети, Валтер Самуел, Жулио Цезар…
40-годишникот се присети на Ибрахимовиќ и денот кога се прогласил како шериф, но тогаш влегол Фиго.
„Еден ден Златан Ибрахимовиќ влезе во соблекувалната и се прогласи дека е шеф, бидејќи наводно заработуваше најмногу. Набргу наиде Фиго и само го погледна накосо, без ниту еден збор. Тука Ибра повлече рачна сопирачка и призна: ‘Добро, Фиго има малку повеќе пари од мене, ама ќе те престигнам за неколку години’“, откри Хименез.
Исто така Хименез зборуваше и за периодот од неговата кариера во Интер, кога на клупата дојде Жозе Мурињо.
„Мурињо веднаш по своето доаѓање направи промени. Бевме повеќе од 30 фудбалери, а тој на претставувањето на совршен италијански кажа дека сака само 24 фудбалери, вклучувајќи и три голмани и три младинци. Сите се прашувавме што ќе биде со останатите, ама тој со секој од нас имаше разговор еден на еден. Ми кажа: ‘Луис, јас сум единствен кој одлучува кој доаѓа, а кој си оди. Не спортски директор или било кој друг. Заборави ги новинарските текстови, само играј и тренирај’“, се присети Чилеанецот.