Ко-сопственикот на Манчестер јунајтед, Сер Џим Ретклиф вели дека летоска ќе потрошат 89 милиони фунти без да купат никого, ова е сумата која ќе треба да се одвои за играчи кои веќе се дел од „ѓаволите“.
Сер Џим Ретклиф синоќа даде неколку интервјуа со цел да брифира за ситуацијата во Манчестер јунајтед откако пред една година купи 28,94% од сопственоста на клубот и презеде контрола врз оперативниот дел.
Најбогатиот Британец во разговор со БиБиСи се пожали дека тој и неговите соработници скапо плаќаат за трансфер грешките од минатото и посочи пет ѕвезди кои не се доволно добри или се преплатени – Санчо, Антони, Касемиро, Хојлунд и Онана.
Со слични коментари излезе и во интервјуто со Гери Невил, каде откри дека „ѓаволите“ летоска ќе потрошат 89 милиони фунти без да купат никого.
„Во твое време (кога Невил играше фудбал), кога го купуваш играчот, тоа е тоа. Сега не е така. Можам да ти кажам дека сметката која треба да ја подмириме летоска за фудбалери кои веќе се купени изнесува 89 милиони фунти“ – вели Сер Џим Ратклиф.
„Значи, и да не купиме никого, ние летоска ќе мора да платиме 89 милиони фунти!“.
Сер Џим Ратклиф не навлезе во детали, но се верува дека добар дел од оваа сума е за играчите кои претходно ги спомна – Санчо, Антони, Касемиро, Хојлунд и Онана.