Дефанзивецот на Манчестер Јунајтед, Хари Мегваер, повторно се најде во фокусот на јавноста по новата судска одлука во Грција за инцидентот што се случи на островот Миконос во 2020 година.
По повторното разгледување на случајот, грчкиот суд му изрече условна казна затвор од 15 месеци. Станува збор за настан од пред неколку години кога англискиот репрезентативец беше вмешан во конфликт со локалната полиција за време на одмор. Во првата пресуда од 2020 година, Мегваер доби 21 месец и десет дена условна казна за телесни повреди, обид за поткуп и спротивставување на полицијата. Сепак, неговата жалба ја поништи пресудата и процесот започна одново.
По новото судење, судот го прогласи за виновен за полесен напад, отпор при апсење и обид за поткуп, па казната беше намалена на 15 месеци условно.
Мегваер и понатаму ја негира вината, а неговиот правен тим најави нова жалба до Врховниот суд со цел целосно да ја поништи пресудата.