Воска Спорт го напушти натпреварот против Вардар при резултат 1-1 лут поради низа судиски одлуки на средбата од 28. коло на ПМФЛ.
Капка која ја прели чашата беше израмнувачкиот гол на вардарци кој предизвика многу полемики. По повлекувањето охриѓани решија да се обратат преку официјално соопштение.
„Воска Спорт сака да изрази револт и да се пожали известувајќи ја Фудбалската федерација на Македонија за контроверзните одлуки на нашиот меч со Вардар.
Од првата минута нашите играчи не беа еднакви на теренот со ривалите. Против нас беа донесени серија нефер одлуки на судиите кои директно влијаеа на текот на натпреварот. Судиите повторувачки грешеа и носеа контроверзни одлуки кои доведоа до нефер игра, а имаше многу недосудени прекршоци врз нашиот тим.
За жал, поради серијата неправди во 76. минута нашиот тим беше натеран да се повлече од натпреварот. Веруваме дека ова е единствен начин за да се одбранат правата на нашите играчи и да се спречат нови влијанија врз интегритетот на спортот. Сакаме да побараме од ФФМ да ги разгледа контроверзните одлуки на судиите и да преземе мерки за спречување на ваквите ситуации и да донесе одлуки кои ќе дадат фер игра и исти шанси за сите тимови“, напишаа од Воска.