Пелистер загуби од Вардар во 25. коло на ПМФЛ со 1-3, а тој натпревар предизвика многу контроверзии.
Битолчани се лути за арбитражата на Фуркан Идризи и неговите помошници. Тие сметаат дека се оштетени, иако не потенцираа одредени ситуации. Од Пелистер напишаа дека се оштетени на последните два натпревари против Шкупи и Вардар. Тие објавија соопштение во кое нагласија дека мора да се почитува традиционален клуб како Пелистер.
„ФК Пелистер чувствува потреба да се обрати до јавноста по последните несреќни и неадекватни арбитражи на нашите натпревари. Со целосен респект и поддршка за судискиот систем и разбирање дека задачата на судиите без ВАР-системот не е едноставна, апелираме нашиот клуб, кој е култен, традиционален, најгледан сезонава во Првата лига, да биде соодветно третиран.
На последните два натпревари против Шкупи и Вардар сведоци сме на целосно извртен и тендециозен критериум, што е многу полош симптом од една индивидуална грешка, која секому може да му се случи. Но, кога критериумот не е изедначен и кога една грешка се надоврзува на друга, апелираме да биде преиспитан перформансот на одредени судии. На споменатите натпревари грешките директно влијаат на резултатот, а со тоа и на изгледот на табелата. Со мирен и професионален тон нагласуваме да се изедначат критериумите, да се постават најдобрите судии за најдобрите натпревари и да се остават во мир да ги носат клучните одлуки. Во овој период на сезоната сведоци сме дека тоа и не е баш така“, стои во соопштението на ФК Пелистер.