Поранешниот француски репрезентативец и некогашен фудбалер на Монако, Манчестер Јунајтед и Јувентус, Патрис Евра, со остри зборови ги коментираше шансите на Барселона пред реваншот од четвртфиналето во Лигата на шампионите.
Атлетико Мадрид во првиот натпревар на „Камп Ноу“ славеше со 2-0, а Евра смета дека каталонскиот тим нема капацитет за пресврт.
„Во Барселона треба да се соочат со реалноста и да покажат повеќе скромност. Ова не е тимот од 2015 година, таа генерација веќе не постои. Оттогаш често разочаруваат на големата сцена и не верувам дека можат да направат камбек“, изјави Евра.
Французинот откри дека на реваншот ќе биде на страната на Атлетико, истакнувајќи доверба во Диего Симеоне и неговиот тим.
„Верувам во Симеоне и неговите фудбалери. Тие се борци и знаат како да ја завршат работата. До навивачите на Барселона, време е да бидете потивки, Европа веќе не ви припаѓа како порано. Го сакам фудбалот, но повеќе ја ценам вистината“, додаде Евра.
Во текот на својата кариера, Евра доживеа три порази во финалињата од Лигата на шампионите токму од Барселона – двапати како играч на Манчестер Јунајтед и еднаш во дресот на Јувентус.