Трансферот на Грузиецот, Квича Кварацхелија од Наполи во Пари Сен Жермен предизвика најголемо внимание оваа зима бидејќи станува збор за еден од најголемите направени во еден зимски преоден рок.
Последен во низата се јави поранешниот фудбалер Александар Мостовој кој го постави прашањето колку ќе напредва Кварацхелија со преминувањето во послаба лига од онаму каде што го стекна името.
„Одлично е за Квича што премина во ПСЖ. Јасно е дека тука се поставуваат разни прашања. Начинот на кој ја напушти Италија каде што беше шампион и заминјувањето во Франција каде што лигата е послаба од Серија А. Се одлучи за ПСЖ кој веќе со години доминира во Лига 1. Наполи можеби нема да биде шампион, но ПСЖ ќе биде сигурно. Квича ќе освои уште трофеи и ќе заработи многу пари со играњето во Париз“, изјави Мостовој.
Поранешнот руски фудбалер потоа додаде и дека парите очигледно биле пресудни при реализацијата на овој трансфер.
„ПСЖ му плати многу на Наполи, но ниту Квича нема да остане без пари. Парите сега одлучуваат за се. Квича е одлично момче, погледнете колку напредуваше во последните три години. Пред само неколку години играше во Русија, сега може да послужи како пример“, заклучи фудбалерот кој најголем дел од својата кариера помина во Селта Виго.