Алесандро Бастони доби критики од сите страни за своето однесување на дерби пресметката против Јувентус и неговата улога во контроверзниот момент, кога Пјер Калулу доби втор жолт картон и беше исклучен.
Интер во саботата ја доби пресметката против Јувентус и по долго време доби еден дерби натпревар во Серија А, но во фокусот на јавноста и понатаму е контроверзниот момент од пред крајот на првото полувреме и исклучувањето на Пјер Калулу.
На удар на јавноста се најде Алесандро Бастони, кој добива критики и од навивачите и од стручните коментатори.
Дефанзивецот на Интер го обвинуваат дека симулирал, а дополнително му замеруваат и за тоа што се радуваше кога виде дека судијата вади црвен картон.
Многумина сметаат дека Алесандро Бастони треба да биде казнет, некои дури и бараат тој да биде изоставен од составот на Италија.
Но Џенаро Гатузо во моментов не размислува за еден ваков чекор, и доколку дефанзивецот нема проблеми со повреда, ќе добие повик од репрезентацијата.
Останува да се види дали ваквиот став ќе го делат и првиот човек на федерацијата, Габриеле Гравина и директорот Џиџи Буфон.