Македонија ја оствари главната цел, пласманот на Европското првенство, но не и таа другата, да се пласираме во Лига Б од Лигата на нации каде што ќе имаме значително поквалитетни ривали.
Но и во Лига Ц следната сезона ќе има некои селекции кои имаат реноме, можеби во моментов не се во форма, но значат во фудбалска Европа.
Северна Ирска, Словачка, Турција и Бугарија се четирите нови репрезентации во Лига Ц, тие испаднаа од Лига Б и се приклучија во нашиот кош.
Во Лига Ц покрај Македонија останаа Грција, Косово, Грузија, Белорусија, Литванија, Луксембург и Азербејџан.
Од Лигата Д во Лигата Ц пласман изборија Фарските Острови и Гибралтар.
Плејоф за опстанок во Лигата Ц ќе играат Кипар, Естонија, Молдавија и Казахстан, две од овие селекции ќе останат во Лига Ц, а две ќе испаднат во Лига Д. (овие мечеви се играат во март)
Од компетитивна гледна точка, неуспех за Македонија е тоа што не изборивме пласман во Лига Б, но останувањето во Лига Ц може да ни биде од корист. Голема е веројатноста дека и преку новата сезона од Лигата на нации ќе може да се стигне до Европско првенство, а патот преку Ц е значително полесен, од Б.
Но пред да почне новата сезона во Лигата на нации, имаме други обврски, учество на Европското првенство и квалификациски натпревари за Светското првенство кое ќе се одржи во Катар 2022.
Фото: ФФМ – Петр Стојановски