Тренерот на Реал Мадрид, Карло Анчелоти во овој период се соочува со критики поради поразот од Барселона во Суперкупот, но и покрај тоа разговараше со медиумите.
Италијанецот во таа прилика посебен акцент стави на францускиот голгетер Килијан Мбапе. Французинот влегува во посакуваната форма, а Анчелоти смета дека со текот на времето Мбапе само ќе биде подобар.
„Секоја екипа има свои подеми и падови. Ние во претходниот период направивме сериозни промени и знам дека на моменти не изгледаме моќно, но тоа е нешто кое допрва ќе го градиме. На сите им се случува да изгубат натпревар, нема ништо страшно. Навивачите ни даваат голема поддршка без оглед на лошите моменти.
Играме на сите фронтови и ќе се бориме за успех. Тимот допрва созрева со секој изминат натпревар, а тоа го гледаме и кај Мбапе. Само прашање на време е кога ќе стане вистински лидер заедно со останатите ѕвезди“, изјави Анчелоти.
Во овој момент Реал Мадрид заостанува само бод зад градскиот ривал Атлетико.