Македонскиот репрезентативец, Исник Алими ги изнесе своите очекувања за натпреварот против Лихтенштајн в недела во Скопје и како што потенцираше најважно во овој дуел е да се освојат трите бода.
Во натпреварот избраниците на селекторот Благоја Милевски влегуваат по поразот на пријателскиот натпревар од Саудиска Арабија со 2-1.
„Нормално, кога губиш не е добро. Саудиска Арабија е добар тим, а ние почнавме со неколкумина нови фудбалери во почетниот состав. Беше добар тест за нас, да видиме до каде сме и треба да анализираме што не беше добро за да не се повтори на следните натпревари. Сега секоја репрезентација е сериозна, но со Лихтанштајн ние треба да победиме, не е важно дали е 1-0, 3-0 или 5-0, најважно е бодовите да останат во Скопје. Тоа е целта за овој меч“, изјави Алими.
Натпреварот се игра на Националната арена „Тодор Проески“ во терминот од 18:00 часот.