Александар Коларов би можел да ја започне својата самостојна тренерска кариера на клупата на Црвена Звезда.
Според информациите на „Калчомеркато“, раководството на српскиот шампион сериозно размислува токму за поранешниот капитен на репрезентацијата како можен наследник на Владан Милојевиќ.
Милојевиќ се најде меѓу главните кандидати за нов селектор на Србија, откако Фудбалската асоцијација го отпушти Драган Стојковиќ по поразот од Албанија во Белград. Доколку во следните недели ја преземе националната селекција, токму Коларов би можел да седне на клупата на Црвена Звезда.
Поранешниот фудбалер на Лацио, Манчестер Сити и Интер моментално е дел од стручниот штаб на „нераѕурите“ како помошник на Кристијан Киву. Тој минатото лето ја напушти младинската репрезентација на Србија за да се врати во Милано и да стекне искуство во тренерската работа.