Во интервју за бразилските медиуми, Нејмар беше прашуван и за шпекулациите кои го поврзуваат со трансфер во Реал Мадрид, за осминафиналето во ЛШ кое ПСЖ го игра токму против кралскиот клуб, како и за Кристијано Роналдо.
Што ќе ни кажеш за шпекулациите кои те поврзуваат со Реал Мадрид? Ќе се вратиш ли во Шпанија…
„Веќе зборував за тоа, секогаш ќе има шпекулации“, вели Нејмар.
Мечот против Мадрид е можност да покажеш дека можеш да бидеш најдобар во светот…
„Најважната работа е да се пласираме во четвртфиналето, а не дека јас сум најдобар во светот. Првата цел е да ја освоиме Лига 1, Купот и Лигата на шампионите што е најважна работа за нас. Индивидуалните награди доаѓаат потоа. Тој натпревар е како финале за нас“.
Што можеш да ни кажеш за Роналдо и Мадрид како тим?
„Имам голема почит за Роналдо, за се што има направено во фудбалот. Тој е огледало во кое се гледам себеси. Десет години на врвот како и Меси. Сите ние сакаме да бидеме како нив. Но, Мадрид не е само Кристијано Роналдо. Има многу големи фудбалери таму“.