Неверојатна приказна: Клуб од село со 5.000 жители стана првак на Црна Гора!

Фудбалерите на Дечиќ на коло пред крајот беа крунисани во шампион на Црна Гора, откако славеа минимално на гостувањето кај Сутјеска (0-1). Во пресрет на последната рунда овој клуб има шест бода предност пред Будуќност кој загуби дома од Морнар (0-1).

Така, Дечиќ дојде до историски трофеј во првенството на Црна Гора. Ситуацијата станува уште поинтересна поради фактот дека Дечиќ доаѓа од малиот град-село Тузи на девет километри од Подгорица. Ова место има помалку од 5.000 жители и сега клубот донесе огромна радост со историската титула.

Со освоениот трофеј доаѓа и пласманот во квалификациите за Лигата на шампионите. Сепак, стадионот „Тушко Поле“ има капацитет од 2.000 навивачи и тешко дека ќе ги задоволи строгите УЕФА стандарди.