Езгјан Алиоски се најде на тапет на фудбалските власти во Англија откако беше пријавен за недолично однесување на мечот помеѓу Барнли и Лидс. Домашните играчи се пожалија кај судијата за еден гест на Македонецот кон Двајт Мекнил, па беше покрената истрага од ФА.

Попладнево пристигна официјално соопштение, ФА извести дека изминатиов период биле направени неколку интервјуа.

Џани Алиоски по крајот на натпреварот на „Трф Мур“ негирал дека неговиот гест е расистички или дискриминирачки и објаснил дека само сакал да му порача на Двајт Мекнил дека е „плачко“ бидејќи неколку минути порано противникот му се обратил со истиот овој збор. Македонецот истиот став го имал и кога бил испрашуван од дисциплинската комисија при ФА.

Кога на фудбалерите од Барнли им била пренесена верзијата која ја раскажал Езгјан Алиоски, тие признале дека можат да го разберат гестот од тој аспект и дека Македонецот се однесувал детски.

Ниту еден сведок на инцидентот не бил целосно убеден дека популарниот Џани се однесувал расистички или дискриминирачки, па ФА ја затвори истрагата и нема да го казни фудбалерот на Лидс.