Категорија: Франција 24.06.2022 13:59
Лео Меси беше трансфер бомбата минатото лето, Аргентинецот ја напушти Барселона и се пресели во ПСЖ. „Светците“ сега се фалат дека зделката била полн погодок, Аргентинецот е машина за пари и помогнал клубот да оствари рекордни 700 милиони евра приходи.
Потписот на Лео Меси донел 10 нови спонзори, кои платиле и повеќе пари.
„Наместо суми помеѓу 3 и 5 милиони евра, добивме суми помеѓу 5 и 8 милиони евра“ - вели директорот Марк Армстрон.
Аргентинецот придонел и за зголемена продажба на дресови, за прв пат ПСЖ продал повеќе од 1 милион дресови, 60% биле со презимето на Меси. Само во првите три часа биле продадени дресови во износ од речиси 1 милион евра. Забележано е зголемување и на продажбата на целиот асортиман во продавниците на ПСЖ.
Поради Лео Меси се бележат и поголеми приходи од продажба на билети, веќе нема слободни места на „Паркот на Принцовите“.
ПСЖ доживеа и бум на социјалните мрежи и доби над 15 милиони нови следбеници по трансферот на Лео Меси.
Аргентинецот, кој дел од платата ќе ја добива во токени, придонесе да се зголеми и цената на криптовалутата на ПСЖ.
И додека „светците“ се фалат, Л'Екип пишува дека ПСЖ годината/сезоната ќе ја заврши со огромен минус, односно загуба помеѓу 200-300 милиони евра.