Повеќе медиуми во Италија пренесоа дека ПСЖ е мошне близу до ангажман на Ашраф Хакими од Интер, откако наводно биле договорени личните услови на Мароканецот.

За услугите на Хакими интерес пријавуваше и Челси, меѓутоа францускиот вицепрвак на крајот излезе како победник во битката за потписот на бекот, според известувањата на „Скај Спорт Италија“, „Газета дело Спорт“, но и „Спортиталија“.

Се верува дека Интер ќе ја прифати понудата од 70 милиони евра на ПСЖ, иако клубот од Милано посакуваше десет милиони евра повеќе од тоа, но и тоа е успех за италијанскиот првак кој лани го ангажираше Хакими од Реал Мадрид за 45 милиони евра.

Хакими изминатата сезона постигна седум погодоци, но и 11 асистенции, а Челси се обиде да го ангажира нудејќи го дури и Маркос Алонсо покрај понудата од 60 милиони евра.