Македонија го забележа и вториот пораз на Европското првенство, против Украина покажавме дека можевме и повеќе отколку што освоивме досега.

„Кога ќе примиш гол од прекин на вакви натпреварувања, станува потешко. Имавме шанси да изедначиме пред пеналот, но таков е фудбалот. Жал ми е што загубивме. Сигурно се виде дека малку сме во грч. Ова се натпревари кои првпат ги играме во нашите кариери. Кога примивме гол како да се опуштивме и како да почнавме да играме“, вели Горан Пандев.

„Ваквите натпревари не трпат импровизации. Ние веќе направивме нешто големо и треба само да излеземе на теренот и да се забавуваме. Треба да играме растоварено, треба да не се плашиме да го загубиме натпреварот. Да излеземе, да одиграме како што знаеме и да дадеме максимум, па и да загубиме да не ни е криво“.