Поранешниот дефанзивец на Ливерпул, Дејан Ловрен тврди дека немал дилеми кога паднала одлуката да ги напушти редовите на „Редсите“, па дури и дека не жали за таквото сценарио, а открива дека Јирген Клоп му испратил порака дека му недостасува во тимот.

„Не, воопшто не жалам за таквата одлука, мојата одлука беше јасна – да си заминам од Ливерпул и да не гледам воопшто назад во минатото“ вели Хрватот во изјавата за руски „Спорт Експрес“.

„Бев прилично вознемирен ланската сезона кога немав доволно минутажа, но, сега се’ е поинаку, јас мислам дека му недостасувам на Ливерпул повеќе отколку што тој клуб мене ми недостасува, а Јирген Клоп добро го знае ова, ние сме во постојана комуникација, тој ми пиша и порака „Ни недостасуваш““ додаде Ловрен.

„Во постојана комуникација сум со Клоп, но секако дека нема да откривам дополнителни детали од нашите разговори, Јирген ми посака само убави работи, а јас истото и нему“ заклучи дефанзивецот кој во шесте сезони за „Редсите“ реализираше 131 настап, на кои постигна и пет погодоци.

Ловрен си замина од составот на актуелниот бранител на титулата во Премиерлигата по шест години во тој клуб, а неговиот трансфер го чинеше руски Зенит 11 милиони фунти.